Виссам Бен-Йеддер қамоқхона ўрнига реабилитациядан ўтмоқчи.

Ўтган ҳафтада "Монако"нинг собиқ форварди жинсий зўравонликда айбланиб, ҳибсга олинганди - воқеа Бен-Йеддернинг машинасида, футболчи маст ҳолатда бўлганида содир бўлган.

L’Equipe нашри хабарига кўра, бугун Прованс апелляция суди Бен-Йеддерни қаттиқ суд назорати остида озод қилиш ҳақидаги қарор устидан шикоят қилган Ницца прокуратурасининг аризасини кўриб чиқди. Прокурорлар Бен-Йеддерни 15 октябрь куни бўлиб ўтадиган суд жараёнигача ҳибсда сақлашни талаб қилмоқда.

Суд жараёнида Бен-Йеддер ўзига қўйилган барча чекловларга қатъий риоя қилишини таъкидлади ва тергов ҳибсхонаси ўрнига реабилитациядан ўтишни таклиф қилди. Суд қарори чоршанба куни эрталаб чиқиши кутилмоқда.

Эслатиб ўтамиз, ўтган йилнинг август ойида Виссам "зўрлаш, зўрлашга уриниш ва жинсий зўравонлик"да айбланган. Ўшанда у 900 минг евро миқдорида гаров эвазига озод қилинган.