Кеча ОФК президентлиги учун сайлов бўлиб ўтди ва унда Баҳрайн футбол ассоциацияси президенти Шайх Салмон бин Иброҳим ал-Халифа ғалаба қозонди. Бошқа номзодлари таиландлик Дато Ворави ва БААлик Юсуф ас-Серкал жуда кам овоз тўплашди ва мағлуб бўлишди.

БААнинг "The National" сайти ушбу сайлов ҳақида таҳлилий мақола эълон қилди. Унга кўра, Юсуф ушбу овоз бериш жараёнида 20-24та овоз кутганини, аммо натижа кутилганидан анча паст бўлганини таъкидлаб ўтган. Сайловдан бир кун олдин эса Осиё олимпия кенгаши президенти Шайх Аҳмад ас-Сабоҳ ва Шайх Салмон бин Иброҳим БАА футбол ассоциацияси президентидан сайловдан ўз номзодини Салмоннинг фойдасига қайтариб олишни сўрашган. Аммо Серкал номзодини қайтариб олишдан бош тортган ва сайловда ғалаба қозонишига ишонган. Натижада эса, юқорида айтиб ўтганимиздек, фақатгина 6 киши Юсуфга берган сўзининг устидан чиққан. Улардан 4таси аниқ — ўзи (БАА), Эрон, Ўзбекистон ва Яман.

Сайловдан кейин Шайх Аҳмад: "Мен Юсуфга айтдим, аммо у менга қулоқ солмади. У билмаган кўп нарсаларни мен биламан. Менинг ҳамма жойда танишларим бор", дея айтиб ўтди.

Шайх Аҳмад ас-Сабоҳ 1991 йилдан бери Осиё олимпия кенгаши раҳбарлигида ишлаб келмоқда ва шу пайтгача 6 марта қайта сайланган. Салмоннинг ғалаба қозонишида Шайх Аҳмаднинг қўллаб-қувватлаши муҳим аҳамиятга эга бўлди.

Салмон бин Иброҳим 2009 йилда ҳам сайловга ўз номзодини қўйганди ва 2та овоз билан Муҳаммад бин Ҳаммамга ютқазганди. Энди эса у ўз мақсадига эришди ва 2015 йилга қадар ОФКни бошқаради.