Халқаро шахмат федерацияси (FIDE) Бош ассамблеяси Қирғизистоннинг Россия ва Беларусь шахматчиларига нисбатан санкцияларни бекор қилиш таклифини рад этди.

Мазкур икки давлатларга қўйилган чекловларни олиш таклифига 22 сентябрь куни етарлича овоз берилмаган.

“21 делегат санкцияларнинг тўлиқ бекор қилиниши учун овоз берган, 41 та давлат эса қарши овоз берган, 27 нафари бетараф қолган ёки овоз бериш жараёнида иштирок этмаган”, деб хабар беради Reuters.

AFP ҳамда Reuters нашрларининг маълум қилишича, Будапештдаги Бош ассамблея FIDE кенгашига 12 ёшгача ёки ногиронлиги бўлган россиялик ва беларуслик шахматчиларни мусобақаларга қабул қилиш имкониятини ўрганиш ва бу борада Халқаро олимпия қўмитаси (ХОҚ) билан маслаҳатлашиш учун овоз берган.

Россия ва Беларусь 2022 йилда Россия—Украина уруши бошлаганидан сўнг FIDEдан чиқариб юборилган, бу эса ушбу давлатларни халқаро миқёсдаги мусобақаларда қатнашишига тўсқинлик қилади.

2024 йил июнь ойида FIDE Этика комиссияси Россия шахмат федерациясини (РШФ) икки йилга халқаро федерация аъзолигидан маҳрум қилган эди. Бундай қарор Украина шахмат федерациясининг Россия тузилмасининг аннексия қилинган Қримдаги, шунингдек, Украинага қарши уруши даврида босиб олинган Украина ҳудудларидаги “фаол фаолияти” ҳақидаги шикоятидан сўнг қабул қилинган.

Икки ой ўтгач, Этика комиссиясининг Апелляция палатаси 45 минг евро жарима эвазига РШФни аъзоликдан чиқариб юбориш тўғрисидаги июндаги қарорини бекор қилган.