24 сентябрь, сешанба куни “Реал” Испания чемпионати 7-тур учрашувида “Алавес”ни мағлуб этди (3:2).
Бу ўйин мадридликлар бош мураббийи Карло Анчелотти учун жамоа бошқарувидаги 300-ўйин бўлди. Италиялик мутахассис "Қироллик клуби" тарихида бу кўрсаткичга эришган иккинчи шахсга айланди.
Анчелотти "Реал" билан 216 ғалаба, 45 дуранг ва 39 мағлубият қайд этган. Мураббий клуб билан 2013 йилнинг июлидан 2015 йилнинг майигача ишлаган, кейин эса 2021 йилнинг июлида жамоага қайтган ва ҳозиргача уни бошқариб келмоқда.
"Реал Мадрид" бош мураббийи сифатидаги ўйинлар сони бўйича рекорд 1960-1974 йилларда жамоа билан ишлаган ва жамоа билан 605 ўйин ўтказган (357 ғалаба, 128 дуранг, 120 мағлубият) Мигель Мунёзга тегишли.
