"Арсенал"нинг ёзги янги футболчиси Рахим Стерлинг "канонирлар" сафида илк бор голда иштирок этди. У Лига кубоги доирасида "Болтон" билан ўйиннинг биринчи бўлими охирида ёш ҳужумчи Этан Нванери учун голли узатмани амалга оширди ва гол муаллифи ўйин ҳисобини лондонликлар фойдасига ишончли тарзда 2:0 га етказди. Стерлингнинг ўзи 64-дақиқада жамоасининг 4-голини киритди. Баҳс 5:1 ҳисобида якунланди.
Шундай қилиб, Стерлингга "Арсенал"даги биринчи голини уриш учун учта ўйин керак бўлди. У "Арсенал" сафида 15 сентябрь куни "Тоттенхэм" билан Шимолий Лондон дербисида (1:0) дебют қилди. Кейин эса Чемпионлар лигасида меҳмонда Бергамода "Аталанта"га қарши ўйнади (0:0).
