Лига 1 (Франция чемпионати) 5-тури аномал натижа билан бошланди:
«Ницца» ўз майдонида «Сент-Этьен» дарвозасига жавобсиз 8та гол урди. Хусусан, мезбонлар биринчи бўлимдаёқ ҳисобни 6:0 кўринишига келтиришди. Бир бўлимда 6та жавобсиз гол - бунақаси XXI асрда илк марта кузатилди Лига 1 кенгликларида.
«Ницца» футболчилари 35-дақиқагача 4:0 ҳисобида олдинга чиқиб олишгач, «Сент-Этьен» бош мураббийи Оливье Даль~Ольо умумий ҳолатга кескин реакция сифатида бирданига 3 нафар футболчини алмаштирди. Бироқ бу чора мутлақо иш бермади, аксинча, «Ницца» қандайдир 3 дақиқа оралиғида яна 2та гол урди. Танаффусдан кейин эса мезбонлар важоҳат ва тезликни пасайтиришди, шунда ҳам 2та ҳужумни самарали якунлаб, 8:0 ҳисобида тўхташди.
Энди баъзи фактларга эътибор қаратинг:
*** «Ницца» жорий аср Лига 1 ўйинининг бир бўлимида 6та гол урган биринчи жамоа бўлди. Тўғри, бу борада чемпионат рекорди «Лион»га тегишли - «тўқувчилар» 1997 йили 45 дақиқа давомида «Марсел»ни 7 марта жазолашга улгуришганди.
*** «Ницца» ўз рекордини такрорлади. Жамоа 49 йил олдин, Франция кубоги-1975/1976да «Голден Стар»ни айнан 8:0 ҳисобида «хўрлаганди».
*** «Ницца» Лига-2024/2025 доирасидаги дастлабки 4та ўйинда жами 6та гол урганди. Энди 1та учрашувда 8та!
*** 0:8 - «Сент-Этьен» ҳаётидаги иккинчи йирик ҳисобли мағлубият. «Яшиллар» 1951 йили «Бордо»га 0:9 ҳисобида ютқазишган.
- Лига 1га зўрға қайтган «Сент-Этьен» («плей-офф»да «Мец»дан умумий 4:3 ҳисобида устун келганди) элитада катта муаммоларга учрамоқда: 5та ўйин, 4та мағлубият ва 1та ғалаба («Лилль» - 1:0), голлар нисбати 1:15.
- 15-16 ёшидаёқ туғма голеадор сифатида катта умид уйғотган, аммо кейинчалик қатор муаммоларга учраган (ҳам ўйин, ҳам кундалик ҳаётда) «Боруссия» Д. ҳужумчиси Юсуф Мукоко ушбу учрашувда 2та гол уришдан ташқари, яна 1тасига ассистентлик қилди. Демак, «Ницца»да ижара муддатини ўтаётган истиқболли ҳужумчида ўзини тиклаб олиш учун зўр имконият бор. Ҳар ҳолда, бош мураббий Франк Эз ҳужумкор ижрочилар жароҳати туфайли Мукокони асосий таркибда ўйнатмоқда.
