"ПСЖ" бош мураббийи Луис Энрике Усмон Дембеленинг хатти-ҳаракатидан мамнун эмасди.
Испаниялик мутахассис франциялик футболчини интизомий сабабларга кўра, Чемпионлар лигаси доирасида Лондоннинг "Арсенал" жамоасига қарши ўйин учун қайдномадан чиқариб ташлади.
L'Equipe хабарига кўра, футболчи ва мураббий ўртасидаги биринчи кескин вазият мавсум бошида, Энрике Витиньяни асосий пенальти тепувчига айлантирган пайтда юзага келган. Дембеле бу қарорни тушунмади ва "Гавр" билан ўйиндан сўнг ўз норозилигини очиқ билдирди.
Яқинда "Ренн" билан учрашув якунида вингер устози томонидан майдонда худбинлик қилгани учун танқид қилинди. Футболчининг ўзи Энрикенинг баъзи тактик кўрсатмаларидан ҳафсаласи пир бўлди - унинг фикрича, бу кўрсатмалар унинг эркинлигини асоссиз равишда чеклайди.
Бироқ, манбага кўра, Энрике ва Дембеле можарони ҳал қилиб бўлишган.
