"Ювентус" ярим ҳимоячиси Поль Погба дисквалификация муддати қисқартирилгани ҳақидаги хабардан кейин фикр билдирди. Ўтган мавсум бошида франциялик футболчи допинг-тестдан ўта олмаган, бунинг учун у 4 йилга футболдан четлаштирилганди.
Кеча ярим ҳимоячининг апелляцияси қаноатлантирилгани маълум бўлди. Спорт арбитраж суди дисквалификацияни 18 ойга қисқартирди. Шу тариқа футболчи кейинги йилнинг март ойидаёқ майдонга қайтиши мумкин бўлади.
"Ниҳоят, бу даҳшатли туш тугади. Энди мен яна орзуларимни амалга оширишим мумкин бўлган кунни интиқлик билан кутаман. Мен ҳар доим била туриб қоидаларни бузмаганимни айтдим. Бу менинг ҳаётимдаги жуда қийин вақт эди, чунки мен кўп меҳнат қилган ҳамма нарсани бир четга суриб қўйиш керак эди. Қўллаб-қувватлаганингиз учун барчангизга раҳмат", - дейди Погба.
