"Челси" ва "Ноттингем Форест" Премьер-лига ўйинида уруш бўлгани учун ҳар икки жамоа жазоланади.
АПЛнинг 7-туридан ўрин олган “Челси” – “Ноттингем Форест” учрашуви (1:1) якунида катта жанжал келиб чиқди. Неко Уильямс Марк Кукурельяни Энцо Марескага итариб юборди ва "кўклар" устози йиқилиб тушди. Жамоа футболчилари жорий мавсумда иккинчи бор ўйинда 6 ва ундан ортиқ сариқ карточка олгани учун лондонликлар 50 минг фунт жаримага тортилиши айтилганди.
BBC нашри хабарига кўра, Англия футбол ассоциацияси “Челси” ва “Ноттингем Форест” клубларини ўз футболчиларини назорат қила олмагани учун айблаган. Клублар пайшанба кунига қадар айбловга жавоб беришлари керак.
Шу билан бирга, маълум бўлишича, муштлашув вақтида "Форест" ҳимоячиси Фелипе Моратога шапалоқ урган "Челси" ҳужумчиси Николас Жексон жазодан қутулиб қолган. Ушбу эпизод ҳатто ВАР ҳакамлари томонидан ҳам кўриб чиқилди, бироқ ҳеч қандай санкция қўлланилмади.
