Осиё чемпионлар лигасининг нимчорак финал дастлабки баҳсини ўтказиш учун «Бунёдкор» жамоаси бироз муракаб йўналиш бўйича Таиландга етиб боришга мажбур. Бу ҳақжа «Бунёдкор» клуби матбуот котиби Аброр Имомхўжаев ўзининг Твиттердаги саҳифаси орқали маълумот берди.
"Қалдирғочлар" 12 май, якшанба куни эрталаб соат 9:00да дастлаб пойтахтимиздан Қозоғистоннинг Олма-ота шаҳрига учишади. У ерда делегация Бангкокка учадиган рейсни 10 соат кутади. Жамоа вақтни бекор ўтказмаслик ва формани ушлаб туриш мақсадида Олма-ота шаҳрида ҳам машғулот ўтказишни мақсад қилган.
Якшанба куни кечаси Таиланд томон училади ва Бангкокка етиб боргандан кейин эса «Бунёдкор» аъзолари Бурирам шаҳригача яна 400 км. масофани босиб ўтишади. Бунинг учун делегация кичик самолётда чартер рейсни амалга оширишни режалаштирган (ортиқча вақт йўқотмаслик мақсадида). Тахминан 1 суткалик сафардан кейин вакилларимиз манзилга етиб боришади.
Тошкентдан Бангкокга тўғридан-тўғри рейс ҳафтанинг сешанба ва пайшанба кунлари йўлга қўйилганини инобатга олсак, бунёдкорчилар Тошкентга пайшанба кунги рейс билан қайтиб келишади.
Эслатиб ўтамиз, "Бурирам Юнайтед" ва "Бунёдкор" ўртасидаги ОЧЛ нимчорак финал баҳси 14 май куни, Тошкент вақти билан соат 16:00да бошланади. Жавоб учрашуви эса 21 май куни соат 19:00да "Бунёдкор" стадионида ўтказилади.