«Биринчи лига регламенти»нинг 15.8-бандида жарималар бўйича қарздорлиги мавжуд бўлган жамоанинг мусобақа қатнашчилари сафидан четлаштирилиши мумкинлиги кўрсатилган. ЎФА Тартиб-интизом қўмитасининг 23 июль кунги қарорига кўра, «Қумқўрғон-1977» жамоаси 15 кун ичида белгиланган жаримани тўлаб бериши, унга қадар эса Биринчи лигага қўйилмаслиги лозим эди.
Ўтган давр мобайнида Лига «Қумқўрғон-1977» иштирокидаги беллашувларига ўз расмийларини юбормади. Орадан 3 ойга яқин вақт ўтган бўлсада, жамоа қўмита қарорини бажармади. Биринчи лига мусобақаси якунланиб бораётгани, турнир жадвалида таранглик ортаётганидан келиб чиқиб, эндиликда Лига «Биринчи лига регламенти»нинг 8.10-бандини ишга туширишга қарор қилди. Унга кўра, «Қумқўрғон-1977» жамоасининг 2024 йилги мусобақа доирасидаги барча натижалари бекор қилинади ва шу тариқа турнир жадвали шакллантирилади.
