«Birinchi liga reglamenti»ning 15.8-bandida jarimalar bo‘yicha qarzdorligi mavjud bo‘lgan jamoaning musobaqa qatnashchilari safidan chetlashtirilishi mumkinligi ko‘rsatilgan. O‘FA Tartib-intizom qo‘mitasining 23 iyul kungi qaroriga ko‘ra, «Qumqo‘rg‘on-1977» jamoasi 15 kun ichida belgilangan jarimani to‘lab berishi, unga qadar esa Birinchi ligaga qo‘yilmasligi lozim edi.
O‘tgan davr mobaynida Liga «Qumqo‘rg‘on-1977» ishtirokidagi bellashuvlariga o‘z rasmiylarini yubormadi. Oradan 3 oyga yaqin vaqt o‘tgan bo‘lsada, jamoa qo‘mita qarorini bajarmadi. Birinchi liga musobaqasi yakunlanib borayotgani, turnir jadvalida taranglik ortayotganidan kelib chiqib, endilikda Liga «Birinchi liga reglamenti»ning 8.10-bandini ishga tushirishga qaror qildi. Unga ko‘ra, «Qumqo‘rg‘on-1977» jamoasining 2024 yilgi musobaqa doirasidagi barcha natijalari bekor qilinadi va shu tariqa turnir jadvali shakllantiriladi.
