"Комо" бош мураббийи Сеск Фабрегас "Барселона" вингери Ламин Ямал ва Каталония клубининг собиқ футболчиси Лионель Месси ўртасидаги солиштиришга муносабат билдирди.
"Мен бу суҳбатларни тушуна оламан. Мен уларни ёқтирмайман, чунки менимча, ҳар бир футболчи бошқача ва ҳар биримизнинг ўз ҳикоямиз бор. Ва энди Ламин ўз йўлини яратиши керак. Лекин, албатта, Лео қандай бўлганини эслаб қоладиган баъзи белгилар мавжуд. Менимча, бу мутлақо нормал ҳолат, айниқса эндигина қийин даврни бошидан ўтказган "Барселона" мухлислари учун", - деди Фабрегас ESPN билан суҳбатда.
"Барселона" тарбияланувчиси Ламин Ямал 2023 йилнинг апрель ойида 15 ёшу 9 ойлигида "кўк-анорранглилар" сафида дебют қилган. 2023 йил сентябрида, 16 ёшу тўлиқ бир ойда футболчи Испания терма жамоасида дебют қилди ва у билан 2024 йил ёзида Европа чемпиони бўлди. Transfermarkt портали "Барселона"нинг 17 ёшли ҳужумкор ярим ҳимоячиси Ламин Ямалнинг ҳозирги трансфер қийматини 150 миллион еврога баҳоламоқда.
Лионель Месси "кўк-анорранглилар" билан 35 та соврин, жумладан 10 та миллий чемпионат ва тўртта Чемпионлар лигасида ғолиб чиқди, жаҳон чемпиони бўлди ва саккиз марта "Олтин тўп"ни қўлга киритди.
