"Манчестер Сити" бош мураббийи Пеп Гвардиола германиялик мутахассис Томас Тухель Англия терма жамоасини қабул қилиб олганидан кейин клуб билан келаси ёзда якунланадиган шартномасини узайтиришга яқин турибди. Бу ҳақда Football Insider хабар бермоқда.

Манбага кўра, Тухел тайинланишидан олдин Англия футбол ассоциацияси терма жамоалар билан ишлашга қизиққан Гвардиола билан боғланган. Бироқ томонлар ҳамкорлик бўйича келишиб олишмаган. Ҳозирда Гвардиола "Манчестер Сити" билан янги бир йиллик шартнома имзолаш вариантини кўриб чиқмоқда.

Аввалроқ ОАВда Гвардиола келаси ёзда инглиз клубини тарк этса, унинг ўрнини "Спортинг" устози Рубен Аморим ёки "Байер" устози Хаби Алонсо эгаллаши мумкинлиги ҳақида маълумотлар пайдо бўлганди.