"Пахтакор" - "Насаф" ўртасидаги ўйиндан кейинги матбуот анжуманида дастлаб қаршиликлар бош мураббийи Рўзиқул Бердиев иштирок этди.

— Бугун аламли мағлубиятга учрадик. Бутун ўйин давомида ташаббус биз томонда бўлди ва кўплаб вазиятларни яратдик. Аммо гол ура олмадик. Шунга қарамай, бугунги ўйинимиздан қониқдим. Бизда ҳам, "Пахтакор" сафида ҳам ёшлар бор. Бугунги ўйинимиз тўғри йўлдан кетаётганимизни кўрсатди. "Пахтакор"га нисбатан яхши ўйнадик. Ўйин тақдирини эса стандарт вазият ҳал қилди.

— "Пахтакор" иккинчи бўлимда ҳисобда олдинда бораётган бўлса ҳам, ярим ҳимоячи ўрнига ҳужумчи Абдухолиқовни туширди. Ушбу ўйинчи алмаштиришнинг "Пахтакор"нинг тактик юриши бўлди деб ўйлайсизми?
— Ҳақиқатан ҳам Абдухолиқов "Пахтакор"нинг ўйинини кучайтирди, тўпни ўзида яхши ушлаб тура олди. Ўйин охирида бизнинг футболчилар ҳам чарчаб қола бошлашганини таъкидлаш лозим. Темурхўжа яхши ўйинчи. Ушбу ўйинчи алмаштириш нима мақсадда қилингани мен аниқ билмайман.

— 75-дақиқада "Насаф"нинг урилган голи инобатга олинмади. Бу вазиятга муносабатингиз.
— Ҳакамнинг ҳар бир қарори ўйин натижасига таъсир қилади. Бу бор гап. Аммо уларнинг бугунги ўйинини таҳлил қилмоқчи эмасман. Улар биздан кўра вазиятни яхши кўра олишади. Балки хато қилгандир, балки хато қилмагандир. Ҳакамларни ўз ишининг устаси деб ҳисоблайман.

— Ҳали олдинда ўйинлар кўп. Ушбу мавсумда жамоанинг асосий мақсади нимадан иборат?
— Мавсум бошида кўпгина етакчи футболчилар жамоани тарк этишди. Раҳбарият уларнинг ўрнини ёшлар билан тўлдиришни вазифа қилиб қўйишган. Фақат ёшлар билан ўйнаб яхши натижа кўрсатиш қийин. Ёшлар ва тажрибали футболчиларни уйғунлаштирган ҳолда ўйинни ташкил қилсак, тўғри йўлдан борамиз. Алланиёзов ва Суюновнинг ёшлиги қолмаган. Улар 22 га тўлиб бўлишган. Уларга ишонч билдирсангиз, ўйнаб кета олишади. Агар ёшларимиздан терма жамоа манфаати йўлида фойдаланишса, бундан хурсанд бўлардик.

— "Насаф" ўз олдига қачон чемпионликни мақсад қилиб қўяди?
— Ҳар доим чемпионлик вазифаси қўйилади. Бундай вазифани кўпгина жамоалар қўяди. Шунинг учун ҳам чемпионатимиз қизғин кечяпти. Сизнинг саволингизга эса аниқ жавоб бера олмайман. Агар раҳбарият чемпионлик вазифасини қўйишса, бундан хурсанд бўламиз ва шу мақсад йўлида ҳаракат қиламиз. Ҳозирча эса юқори ўринлар учун курашиб, ёшларни тарбиялаш ушбу мавсумда асосий вазифамиз.

— Элдорбек Суюнов стандартдан гол ўтказиб юборганидан кейин тушкун ҳолатга тушиб қолгандек бўлди...
— Ушбу вазият — дарвозабоннинг хатоси эмас, Козакнинг маҳорати. Бундай вазиятларни голга айлантирадиган футболчилар чемпионатимизда кам топилади.