"Бавария" ярим ҳимоячиси Александр Павлович Германия Бундеслигасининг 7-турида "Штутгарт"га қарши ўйинда олган жароҳатидан кейин операция қилинди. Учрашув мюнхенликларнинг йирик ҳисобдаги ғалабаси билан якунланди – 4:0.
"Меҳрли хабарларингиз учун ташаккур. Операция яхши ўтди. Энди имкон қадар тезроқ майдонга қайтиш учун ҳамма нарсани қиламан. Мен кучлироқ қайтаман", — деб ёзди Павлович ижтимоий тармоқдаги саҳифасида.
Жорий мавсумда Павлович барча турнирларда тўққизта ўйинда қатнашиб, битта гол ва битта голли узатмага муаллифлик қилди. Футболчининг клуб билан амалдаги шартномаси 2029 йилнинг ёзига қадар амал қилади. Transfermarkt порталида берилган маълумотларга кўра, футболчининг бозор қиймати 50 миллион еврони ташкил қилади.
