Футбол мутахассиси Алишер Никимбаев Ўзбекистон терма жамоаси ҳимоячиси Абдуқодир Ҳусанов АПЛда ўйнаши учун талабларга жавоб бера олиши ҳақидаги саволга жавоб берди.
Унинг фикрича, Англия чемпионатида ўйнаш ҳуқуқини қўлга киритиш учун футболчи баъзи мезонларга кўра баҳоланади.
10 дан 14 гача ёки ундан ҳам камроқ балл тўплаш орқали ҳам Премьер Лигада ўйнаш ҳуқуқини қўлга киритиш вариантлари мавжуд. Аммо унда клуб махсус комиссия кўриб чиқиши учун ариза топшириши керак бўлади. Бунда, масалан, футболчи алоҳида ҳолатларда 15 очко тўплаган бўларди, деб исботлаш керак. Истисно сифатида ариза беришнинг яна бир варианти спортчининг “ёш футболчи” сифатида эътироф этилишидир. Жорий мавсум учун ушбу тоифага 2003 йил 1 январдан олдин туғилган футболчилар киради. Яъни, 2004 йилнинг 29 февралида туғилган Абдуқодир Ҳусанов яна бир ярим мавсум олий лигада ёш саналади.
Эҳтимол, унга истисно сифатида ариза керак эмасдир. Унинг турли мезонларни ҳисобга олган ҳолда олиши мумкин бўлган очколарини ҳисоблаб чиқамиз.
1. Миллий терма жамоа ўйинлари
Ўзбекистон миллий терма жамоаси рейтингда ТОП-50 га кирмагани учун ўзбекистонлик футболчи олиши мумкин бўлган максимал 2 очко. Бунда у шу вақтга қадар икки йил давомида майдонда камида 90% ўйин вақтида қатнашган бўлиши керак. 80—89% учун 1 балл беради. Ҳусановнинг кўрсаткичи ҳамон 80 фоиздан паст, шунинг учун у терма жамоа ўйинлари учун очко ололмайди.
2. Маҳаллий чемпионатдаги дақиқалар
Дунёдаги барча лигалар 6 тоифага бўлинган. Ҳусанов тўп сурадиган Лига 1 биринчи тоифага киради. Таққослаш учун Ўзбекистон Суперлигаси олтинчи тоифадан жой олган.
Суперлигада дақиқалар олиб келиши мумкин бўлган максимал очко— 2. Агар ўйинчи Франция чемпионати ўйинларида камида 90% ўйнаса, у 12 очко олади. Бундай ҳолда, дақиқалар ариза берилган кундан бошлаб 12 ой давомида ҳисобланади.
Жорий йилнинг январь ойидан буён ўтказилган ўйинларни ҳисобга оладиган бўлсак, ҳозир Ҳусанов 1-лигадаги ўйинларнинг 55 фоизида майдонда ҳаракатланди. Бу натижа унга 8 очко беради.
3. Қитъадаги клуб турнирларидаги дақиқалар
Бу ерда барча турнирлар уч тоифага бўлинган. УЕФА Чемпионлар Лигаси биринчи, Европа Лигаси ва Конференциялар Лигаси иккинчи, барча Осиё турнирлари учинчи ўринда.
Осиёда ўйнашда тўпланиши мумкин бўлган максимал балл — 2. Биринчи тоифадаги ўйин вақти камида 90% бўлса, 10 балл берилади.
Ҳусанов 2023—24 йилги мавсумда Чемпионлар Лигасида “Ланс” билан иккита ўйин ўтказган. Ўша ўйинлар ҳали ҳам 12 ойлик даврга тўғри келади. Аммо Абдуқодир ўйин вақтининг 30 фоиздан камида қатнашгани учун ҳеч қандай очко ололмайди.
Ҳимоячи 2024—2025 йилги Европа Лигаси саралаш босқичидаги иккита ўйинда қатнашди. Ҳусанов ўйиннинг 60% вақти давомида ҳаракат қилди, бу эса унга 2 балл тақдим этади.
4. Жамоанинг ички чемпионатдаги ўрни
Агар футболчи ички чемпионатнинг камида битта ўйинида рўйхатдан ўтган ёки мамлакат кубогида ўйин вақтининг камида 1 фоизини майдонда ўтказган бўлса, жамоа қандай ўйнаганига қараб очколар берилади.
Биринчи тоифадаги чемпионат 6 очко беради. Ўзбекистон чемпиони унвони футболчига 1 очко тақдим этади. Дарвоқе, Суперлигага ўтган Про Лига жамоаси футболчилари ҳам шунча очко олади.
Ҳусанов “Ланс” билан бирга Франция чемпионлигига эришмади, лекин Европа Лигасига йўлланма олди. Бу унга 2 очко беради.
5. Клубнинг қитъада турнирларидаги самарали иштироки
Агар “Ланс” ўтган мавсумда Чемпионлар Лигасида гуруҳидан чиққанида, Ҳусанов 7 очкога эга бўлиши мумкин эди. “Ланс” бу мавсумда Европа Лигасининг гуруҳ босқичига йўл олганида ҳам, Ҳусанов 2 очко олган бўларди. Лекин, афсуски, Абдуқодир бу мезон бўйича ҳеч қандай очко тўпламайди.
Дарвоқе, ўтган мавсумда ОФК кубогининг ҳудудлараро финалига чиқиш “Абдиш-Ота” футболчиларига 1 очко келтирганди.
6. Ҳозирги чемпионатнинг даражаси
Бу ерда ҳамма нарса оддий. Биринчи тоифа учун — 12 балл, олтинчи — 2 балл.
Лига 1, юқорида таъкидланганидек, биринчи тоифада. Яъни, Ҳусанов бу тоифада 12 очко жамғарган.
“Шундай қилиб, Ҳусановнинг жами тўплаган очкоси:
Миллий терма жамоа учун — 0;
Лига 1 да ўйнаган вақти учун — 8;
Европа Лигасидаги дақиқалар учун — 2;
Европа Лигасига йўлланма учун —2;
Клубнинг қитъада турнирларидаги самарали иштироки —0;
Лига 1 даги ўйинлардаги иштироки учун — 12.
Жами: 24 очко. Ҳеч қандай истисносиз Абдуқодир Ҳусановнинг очколари Премьер Лигадаги жамоалардан бирида ҳаракатланиши учун етарли”, дея хулоса қилди футбол мутахассиси.
