Мадриднинг «Реал» клуби собиқ ҳужумчиси, ҳозирда жамоасиз қолган Мариано Диас фаолиятини Испания иккинчи дивизионида давом эттириши мумкин. Бу ҳақда "Todofichajes" портали саҳифаларида хабар берилди.
Манбага кўра, 31 ёшли ҳужумчи «Тенерифе»нинг қизиқиш доирасига тушиб қолган. Жамоа ҳозирда Сегунда турнир жадвалида охирги ўринни эгаллаб турибди. Клуб Диаснинг трансфери клубга турнирдаги мавқеини яхшилашга ёрдам беришига умид қилмоқда.
Ўтган мавсумда Мариано «Севилья» шарафини ҳимоя қилди. Ҳужумчи Испания Ла лигасида 9 та ўйинда қатнашиб, бирорта самарали ҳаракат амалга оширмаган.
