«Реал»дагиларнинг барчасига ҳам Флорентино Переснинг Парижга учмаслик қарори ёқмади.
"Relevo" нашрининг таъкидлашича, «Олтин тўп»ни Винисиус Жуниор ва ҳатто Дани Карвахаль ҳам қўлга киритмаслиги маълум бўлгач, «қаймоқранглилар»нинг 77 ёшли президенти "France Football" мукофотини топшириш маросимига бормаслик ҳақида якка ўзи қарор қабул қилди.
Переснинг позицияси клубдан ҳеч ким Париждаги тадбирга бормаслигини англатарди. Сўнгги бўлиб «Реал»нинг институционал алоқалар бўйича директори Эмилио Бутрагеньо маросимга боришдан воз кечди. Бутун делегациянинг сафари бекор қилинганидан сўнг, у клубнинг ягона вакили бўлиши кутилаётган эди.
Парижга сафар қилмаслик «Реал»нинг барча аъзолари - ўйинчилардан ва мураббийлардан тортиб менежерларигача - томонидан қўллаб-қувватланди. Ҳаммаси мукофот ташкилотчиларининг «адолатсиз» қарори муносабати билан Винисиусга ҳамдардлик билдирмоқчи эди.
Шу билан бирга, турли сабабларга кўра президент қарорига қўшилмаганлар ҳам кўп бўлгани айтилади - «Мадрид»даги баъзи одамлар «Шатлье» театридаги маросимга боришни хоҳлашган. Клубнинг баъзи вакиллари одоб сақлаш учун бу қарорга эътироз билдирмаган.
