Жаҳон шахмат федерацияси октябрь ойи якунлангач, ўз рейтингини янгилади. Ушбу янгиланган жаҳон рейтингида кучли 100 ликдан 5 нафар ўзбекистонлик гроссмейстер ўрин олди.
Рейтингда Нодирбек Абдусатторов (2777) 6-ўринда қайд этилди. У аввалги ойда ҳам шу ўринда қайд этилган эди, аммо бу сафар унинг рейтинг очколари 6 очкога камайган.
Бундан ташқари, энг кучли шахматчилар рейтингида Рустам Қосимжонов (2685) ҳам ўрин олган. Тажрибали шахматчи — 44-ўринда. Жавоҳир Синдоров (2682) аввалги ойда 56-ўринда қайд этилган эди, бу ойда у 46-ўрин кўтарилди. 2681 рейтинг очкосига эга шахматчи Шамсиддин Воҳидов 48-ўринга кўтарилди. Аввалги ойда кучли 75-ўринда қайд этилган Нодирбек Якуббоев (2668) бу ойда 62-ўринда қайд этилди. Нодирбек Абдусатторовдан ташқари барча ўзбек шахматчилари ўз ҳисобларига қимматли рейтинг очколарини ёзиб қўйди.
Сентябрь ойида Нодирбек ёшлар ўртасидаги расмий рейтингда биринчи ўринда қайд этилган эди. Октябр ойи учун эълон қилинган рейтингда у ўрнини Ҳиндистонлик Гукешга бўшатиб берди ва ҳануз ўша ўринда жойлашган. Гукеш 2783 рейтинг очкоси билан ёшлар ўртасида етакчилик қилмоқда. Яна бир шахматчи Жавоҳир Синдоров 5-ўринни эгаллаб турибди.
