Душанба куни кечки маҳал "Бунёдкор"нинг Бурирамдаги биринчи машғулоти бўлиб ўтди.

Машғулот маҳаллий вақт билан соат 18:45да бошланди. Миржалол Қосимов ўз шогирдларига маҳаллий об-ҳавога мос ўйин кўрсатиш учун турли хил юкламаларни берди.  Жараён мураббийлар штабининг аввалдан ишлаб чиққан режалари асосида ўтди. Таиландга олиб келинган барча футболчилар расмий машғулотда жангавор руҳда шуғулланишди.

Таиланднинг етакчи клубларидан бири - "Бурирам Юнайтед"га тегишли бўлган "New I-Mobile Stadium" аренаси билан яқиндан таништириб ўтамиз.

Стадион ва биз жойлашган меҳмонхона орасидаги масофа 10-12 дақиқалик йўлни ташкил этади. Арена Англия стадионлари лойиҳаси асосида қурилган. Умумий ҳисобда 24 минг томошабинни ўз бағрига сиғдира олади.

Ташкилотчилар эртанги баҳсда 22 минг атрофида мухлис келишини таҳмин қилишмоқда. Чипталар нарҳи 500 батт (1 батт таҳминан 100 сўмни ташкил этади).

Эслатиб ўтамиз, Осиё Чемпионлар лигаси 1/8 финали доирасидан ўрин олган "Бурирам Юнайтед" - "Бунёдкор" учрашуви 14 май куни Тошкент вақти билан соат 16:00да бошланади.

Мирзаҳаким Тўхтамирзаев,
Бурирам, Таиланд