Алексей Евстафеев бош мураббийлигидаги Ўзбекистон ёшлар терма жамоаси 12 май куни Тошкент шаҳрида навбатдаги ўқув-машғулот йиғинини бошлагани ҳақида аввалроқ хабар берган эдик. 14 май уни Ўзбекистон ёшлар терма жамоаси (U-19) Тошкент шаҳрида олиб борилаётган ўқув йиғини доирасида Тошкентнинг «Локомотив» клуби ёшларига қарши назорат учрашувини ўтказди.

Тошкентдаги «Тўқимачи» стадионида бўлиб ўтган назорат учрашуви голларга бой бўлди ва унда 3:4 ҳисобида «Локомотив» ёшлари ғалаба қозонишди. Ёшлар терма жамоасининг голларига Андрей Сидоров ҳамда Игорь Роговановлар (2 та) муаллифлик қилган. Маълумот ўрнида, Евстафеев бош мураббийлигидаги ёшлар терма жамоаси Тошкентда 17 май кунига қадар машғулот олиб боришади.

Қайд этиш лозим, Евстафеев бош мураббийлигидаги Ўзбекистон ёшлар терма жамоаси шу йилнинг сентябрь ойида 2014 йили Мянмада бўлиб ўтадиган ёшлар ўртасидаги Осиё чемпионати саралаш баҳсларида иштирок этади. Ўзбекистон ёшлари саралаш баҳсларининг «А» гуруҳида Қатар, Туркманистон, Ҳиндистон ва Непал ёшлар терма жамоаларига қарши баҳс олиб борадилар. «А» гуруҳи баҳсларига эса, Қатар мезбонлик қилади.