«Реал Мадрид» қишда трансфер пайтида баъзи футболчилар билан шартнома имзоламоқчи.

Жорий мавсумда жамоа ишончсиз натижалар қайд этмоқда. Клуб кетма-кет иккита муҳим ўйинда мағлубиятга учради - «Барселона» (0:4) ва «Милан» (1:3). Ла Лигада «қаймоқранглилар» иккинчи ўринда боришмоқда. Жамоа битта кам ўйин ўтказган ҳолда каталонияликлардан 9 очко ортда қолмоқда. "Қироллик клуби" Чемпионлар Лигасида эса 4 турда 2 та мағлубиятдан сўнг 17-ўринда бормоқда.

Сўнгги ҳафталарда клуб ёзда таркибни шакллантириш ёки бу борада керакли мувозанатни сақлаш бўйича қилинган ишлар у қадар муваффақиятли бўлмаганини тан олди. Бу ҳақда "Marca" нашри хабар тарқатди.

Шу билан бирга, раҳбарият вазиятни тўғирлаш учун ҳали вақт борлигига ишонмоқда. Шунинг учун мадридликлар январь ойига ҳозирданоқ тайёргарликни бошлаган. Жамоадаги вазиятни Даниел Карвахалнинг оғир жароҳати оғирлаштирди. Унинг йўқлиги кейинги натижаларга таъсир кўрсатди.

"Реал" 5 йилдан бери қишки трансфер пайтида футболчи сотиб олмаётган эди. Бу сафар жамоа ўз анъанасини бузишга мажбур.

Эслатиб ўтамиз, ҳужумчилар Килиан Мбаппе ва Эндрик ёзда «Реал» сафига қўшилган бўлса, Тони Кроос, Хоселу, Начо Фернандес ҳамда бир қанча ёш футболчилар жамоани тарк этишди.