Суперлига 24-турида "Пахтакор" Наманганда "Навбаҳор"га қарши ўйнайди.
"Навбаҳор"дан Аброр Исмоилов, "шерлар"дан Пўлатхўжа Холдорхонов дисквалификация туфайли мазкур беллашувда майдонга туша олмайди. Ушбу жамоалар чемпионатлар доирасида барча мавсумларда иштирок этиб келишмоқда. Юқори лигада энг кўп тўқнашувлар шу икки клуб ўртасида кузатилган.
Ҳозирга қадар жамоалар чемпионатларда 67 учрашувда майдонга тушишган. Ўзаро ўйинлар бўйича устунлик яққол "Шерлар" тарафида. 41 баҳсда зафар қучган "Пахтакор" 13 бор рақиб билан дуранг ўйнаган ва 13 марта имкониятни бой берган. "Навбаҳор" дарвозасига 109 гол урилиб, 51 тўп ўтказиб юборилган. 9 баҳсда "Шерлар" йирик ҳисобда устун келишган. Айни пайтгача Наманганда бўлиб ўтган 33 баҳснинг 14тасида тошкентликлар зафар қучган бўлса, 7 ўйин дуранг билан тугаган. Қолган 12 учрашув рақиб ғалабаси билан якунланган. Наманганда "Пахтакор" 39 тўп киритиб, 31 гол ўтказиб юборган.
Ушбу жамоаларнинг ўзаро ўйинлари тарихида қайд этилган энг йирик ҳисоб - 7:0. Ушбу ҳисоб 2009 йили Тошкентда бўлиб ўтган учрашувда қайд этилиб, унда “Пахтакор” зафар қучган.
“Навбаҳор” ва “Пахтакор” жамоалари ўртасидаги ўйин 9 ноябрь, шанба куни 16:00да Намангандаги "Марказий" стадионда бошланади.
