Superliga 24-turida "Paxtakor" Namanganda "Navbahor"ga qarshi o‘ynaydi.

"Navbahor"dan Abror Ismoilov, "sherlar"dan Po‘latxo‘ja Xoldorxonov diskvalifikasiya tufayli mazkur bellashuvda maydonga tusha olmaydi. Ushbu jamoalar chempionatlar doirasida barcha mavsumlarda ishtirok etib kelishmoqda. Yuqori ligada eng ko‘p to‘qnashuvlar shu ikki klub o‘rtasida kuzatilgan.

Hozirga qadar jamoalar chempionatlarda 67 uchrashuvda maydonga tushishgan. O‘zaro o‘yinlar bo‘yicha ustunlik yaqqol "Sherlar" tarafida. 41 bahsda zafar quchgan "Paxtakor" 13 bor raqib bilan durang o‘ynagan va 13 marta imkoniyatni boy bergan. "Navbahor" darvozasiga 109 gol urilib, 51 to‘p o‘tkazib yuborilgan. 9 bahsda "Sherlar" yirik hisobda ustun kelishgan. Ayni paytgacha Namanganda bo‘lib o‘tgan 33 bahsning 14tasida toshkentliklar zafar quchgan bo‘lsa, 7 o‘yin durang bilan tugagan. Qolgan 12 uchrashuv raqib g‘alabasi bilan yakunlangan. Namanganda "Paxtakor" 39 to‘p kiritib, 31 gol o‘tkazib yuborgan.

Ushbu jamoalarning o‘zaro o‘yinlari tarixida qayd etilgan eng yirik hisob - 7:0. Ushbu hisob 2009 yili Toshkentda bo‘lib o‘tgan uchrashuvda qayd etilib, unda “Paxtakor” zafar quchgan.

“Navbahor” va “Paxtakor” jamoalari o‘rtasidagi o‘yin 9 noyabr, shanba kuni 16:00da Namangandagi "Markaziy" stadionda boshlanadi.