Исроил ҳукумати ўз фуқароларига терма жамоанинг Миллатлар Лигаси доирасидаги Франция билан ўйинига бормасликни тавсия қилди.

Аввалроқ Франция ички ишлар вазири Бруно Ретаиллот Амстердамдаги воқеалар фонида ўйинни кейинга қолдиришга қарши чиққанди: "Бу зўравонлик ва антисемитизмга ён бериш билан баробардир".

Европа Лигаси доирасидаги “Аякс” —“Маккаби” учрашувидан (5:0) сўнг, Исроил клуби мухлисларига кетма-кет ҳужумлар уюштирилганди.

Ҳужумлар туфайли Исроил ҳукумати ўз фуқароларига келгуси ҳафтада спорт мусобақаларига бормасликни маслаҳат берди. Айниқса, Франция—Исроил ўйинига ташриф буюришни хоҳловчи мухлисларни огоҳлантирди.

"Миллий хавфсизлик кенгаши хориждаги исроилликларга эҳтиёт чораларини кўришни тавсия қилади, айниқса келгуси ҳафтада исроилликлар иштирок этадиган спорт ва маданий тадбирларга, хусусан, Исроил терма жамоасининг Парижда бўлиб ўтадиган ўйинига бормасликни маслаҳат беради”, дейилади Бош вазир идораси хабарида.

Маълумот учун, 14 ноябрь куни Париждаги “Стад де Франц” стадионида Миллатлар лигасининг 5-тури доирасидаги Франция – Исроил ўйини бўлиб ўтиши режалаштирилган. Ушбу ўйинда хавфсизликни таъминлаш учун жами 4000 полиция ходимлари ва жандармлар сафарбар қилинади.