АПЛ мавсуми ортиқча шов-шувларсиз одимламоқда.
«Ливерпуль», «Манчестер Сити» ва «Арсенал» ўтган мавсум якунидагидек совриндор учликни банд этишган. Дебютантлар учлиги эса жадвалнинг сўнгги 6 жамоаси орасида. Клублар иштирокида эътиборга лойиқ шиддат йўқлиги боис, алоҳида ижрочилар ўйинларини кўриб чиқиб, кутилмаган натижаларга эришаётган футболчилар билан таништиришни лозим топдик.
Лиам Делап (ҳужумчи, «Ипсвич Таун»)
Бир неча йил муқаддам биз «Манчестер Сити» тизимида таҳсил олган Рори Делапнинг ўғлига жиддий эътибор қаратишга даъват этгандик. Аввалига у «Ипсвич» таркибида атиги 2 марта майдонга тушган бўлсада, уни «шаҳарликлар»дан 15 млн. фунтга харид қилиш клуб мутасаддиларига малол келмади. Лиамнинг баҳоси ёзда 20 миллионга кўтарилиши унинг жорий мавсумдаги иштирокига боғлиқ.
Нима бўлганда ҳам, «Ипсвич» учун келишув чакки эмас. 21 ёшли ҳужумчи стартдаги 10та ўйинда 5та гол урди. Агар жамоа элитадаги ўрнини бой бериб қўймаса, бунга Лиамнинг сермаҳсуллиги эвазига эришган бўлади. Ёш ҳужумчи 4та гол учун 11та зарбани амалга оширди ва самарадорлик бўйича 10тадан кўпроқ уринишлардан фойдаланган футболчилар орасида 3-натижани қайд этди.
Тайлер Диблинг (ярим ҳимоячи, «Саутгемптон»)
«Авлиёлар» ҳам «Ипсвич» каби мавсумни муваффақиятли бошлай олмадилар. Лекин Рассель Мартин жамоасида 18 ёшли Диблинг ажойиб ўйин кўрсатмоқда. Жорий мавсумга қадар у атиги бир марта захирадан майдонга тушганди. «Саутгемптон» сафидаги илк голини Тайлер ўтган ойда «Ипсвич» дарвозасига урди. Бундан ташқари, «МЮ»га қарши ўйинда жамоаси учун пенальти ишлаб берди. Маълумотларга кўра, голли вазиятларни яратиш бўйича (7та) Диблинг - АПЛ етакчиси.
Жон Дуран (ҳужумчи, «Астон Вилла»)
Олли Уоткинснинг ўринбосари бўлган Дуран ҳар гал захирадан тушиб, ўзининг маҳоратини намойиш этмоқда. 20 ёшли ҳужумчи бирор марта бошланғич таркибда тушмаган ҳолда, АПЛ доирасида 4та гол урди. Шундан 3таси «Вест Хэм», «Лестер» ва «Эвертон»га қарши беллашувлар тақдирини ҳал қилди. Дарвоқе, ёш иқтидорнинг «Бавария»га урган голи ҳам ЕЧЛда жамоасига ғалаба келтирди. Жон «Вилла»ни жонлантирмоқда.
Райан Гравенберх (ярим ҳимоячи, «Ливерпуль»)
Таянч ярим ҳимоячисига эҳтиёж сезган «Ливерпуль» ёзда Мартин Субимендига харидор бўлганди. Бироқ футболчи «Реал Сосьедад»ни тарк этишни истамади. Энди ҳаммаси «қизиллар» учун хайрли кечаётгандек, уларга Субименди керак эмас. Чунки Арне Слот даврида Гравенберх янги фазилатларини юзага чиқармоқда. Ўтган мавсумда Юрген Клопп 22 ёшли нидерландияликни 12та ўйинда майдонга туширганди. Ҳозир у асосий таркиб ўйинчиси мақомида ҳужумкор услуб ташкилотчиси ролини адо этмоқда. У «қизиллар»нинг стартдаги 10 ўйинда 8та ва ЕЧЛдаги 3та ғалабасига сезиларли улуш қўшди.
Рауль Хименес (ҳужумчи, «Фулхэм»)
2022 йилнинг мартидан 2023 йилнинг ноябрига қадар 33та учрашувда бирорта гол ура олмаган мексикалик тажрибали ҳужумчини кўпчилик ҳисобдан чиқариб қўйганди. Табиийки, асосий вазифасини адо эта олмаган футболчи учун бу улкан ҳалокатга тенг. Ўша даврда Хименес «Вулверхемптон» ва «Фулхэм» клублари таркибида тўп сурди. 33 ёшли ҳужумчи жорий мавсумда спорт формасини тиклашга муваффақ бўлиб, 10та ўйинда 4та гол ва 1та самарали узатмани амалга оширди.
Шуни ҳам унутмаслик керакки, яқин ўтмишда Рауль жиддий синовларни бошдан кечирди. 2019/2020 йиллар мавсумида у чемпионат доирасида 17та голни расмийлаштирганди. Бироқ 2020 йил ноябрида унинг бош суягида нафақат фаолияти, балки ҳаёти учун ўта хавфли бўлган дарз пайдо бўлгани аниқланиб, 8 ойни муолажалар билан ўтказди. Шундай экан, Хименеснинг ҳозирги сермаҳсуллиги у учун улкан муваффақият билан баробар.
Рико Льюис (ҳимоячи, «Манчестер Сити»)
Эндигина 19га чиққан Льюис «шаҳарликлар» ва Англия терма жамоасининг муҳим ўйинчиси мақомига кўтарилгани юксак кўрсаткич. Ўтган мавсумда Рико атиги 8та учрашувда иштирок этган бўлса, жорий мавсум стартидаги 10та ўйиннинг 9тасида майдонга тушди. Льюис ҳимоя чизиғининг иккала қанотида ишончли тўп суради, Родри оғир жароҳатга дуч келган пайтда таянч ярим ҳимоячиси ролини адо этди. ундаги универсаллик фазилати клуб ва терма жамоага манфаат келтиришига шубҳа йўқ.
Нони Мадуэке (вингер, «Челси»)
«Аристократлар» таркибида ўз ўрнини топиш осонмас. Мадуэке узоқ вақт давомида эътибордан четда қолиб кетди. Лекин жорий мавсум унинг анойи эмаслигини исботламоқда. ЕЛдаги «Серветт»га қарши беллашувдаги (2:0) голдан кейин Нони ажойиб ўйинлари эвазига етакчиларнинг бирига айланди. Англия терма жамоасида дебютини нишонлагач, «Вулверхемптон»га қарши баҳсда хет-трикни расмийлаштирди. Кейин «Ноттингем Форест» дарвозасини ишғол этди. Натижада Мадуэке АПЛдаги 9та ўйинда 4та голни ўз ҳисобига ёзиб қўйди. Ўтган мавсумда у 23 марта майдонга тушиб, 5та гол урганди.
Антуан Семеньо (ҳужумчи, «Борнмут»)
Ўтган йил январида Гана терма жамоаси ҳужумчисини ўз сафига қўшиб олиш «Борнмут» учун 10 млн. фунтга тушганди. АПЛнинг дастлабки 17та ўйинида Антуан атиги 2 марта рақиб дарвозасига йўл топа олганди. Энди эса чинакамига очилиб, шиддаткор ва чаққон мерганга айланди. Ҳозирга қадар ҳужумчи «Ноттингем Форест», «Эвертон» ва «Саутгемптон» жамоаларини ўз дарвозаларидан тўп олиб чиқишга мажбур этди. Шунингдек, «Сити» устидан қозонилган чиройли ғалабада биринчи голни урди ва қудратли «Арсенал»га қарши баҳсда рақиб ҳимоячиларини чалғитиш билан ғалабага муҳим ҳисса қўшди.
Содиқ СОБИР тайёрлади
