Мадриднинг "Реал" клуби ҳамон жамоадан кетган Тони Крооснинг ўрнини тўлдириш йўлини қидирмоқда.
Ярим ҳимоячи ўтган мавсумдан сўнг 34 ёшида фаолиятини якунлади. ESPN хабарига кўра, "Реал Мадрид" жамоада Кроос илгари тақдим этган ижодкорлик ҳозирда етишмаяпти, деб ҳисоблайди. Шу муносабат билан клуб "Байер" ярим ҳимоячиси Флориан Вирцнинг бўлажак трансфери борасидаги ишларни кучайтирди.
21 ёшли қимматбаҳо немис футболчисини қўлга киритиш осон бўлмайди, чунки Европа футболининг бошқа гигантлари ҳам унга даъвогарлик қилмоқда. Transfermarkt портали "доришунослар" юлдузининг нархини 130 миллион еврога баҳоламоқда.
