Агар Карло Анчелотти истеъфога чиқарилса, "Реал Мадрид" Сантяго Соларини тайинлаши мумкин.

65 ёшли италиялик бу мавсумда жамоанинг ишончсиз ўйинлари, жумладан, "Барселона" (0:4) ва "Милан" (1:3)дан кетма-кет икки марта мағлубиятга учрагани учун танқидлар нишонига айланган. Ла Лигада мадридликлар иккинчи ўринда ва бир ўйин билан каталонияликлардан 6 очко ортда қолмоқда, Чемпионлар лигасида эса 4 турда 2 та мағлубиятдан сўнг 17-ўринда бормоқда.

АС нашри хабарига кўра, Анчелоттининг "Реал" бош мураббийи сифатидаги келажаги сўроқ остида. Унинг ўрнига директор Сантяго Солари номзод сифатида кўрилмоқда.

Аргентиналик футболчи 2000 йилдан 2005 йилгача "Реал Мадрид"да ярим ҳимоячи сифатида ўйнаган ва Хулен Лопетеги истеъфога чиқарилганидан кейин 2018 йилнинг октябридан 2019 йилнинг мартигача жамоани бошқарган.

Солари бошчилигида мадридликлар 31 учрашув ўтказиб, 21 та ғалабага эришган, 2 бор дуранг ўйнаган ва 8 та мағлубият аламини тотиб кўрган. Аргентиналик мутахассис 2019 йил март ойининг биринчи ҳафтасида Чемпионлар лигаси доирасида “Аякс”дан учралган мағлубият (1:4) ва “Барселона”дан учралган икки мағлубиятдан сўнг (Кубок ва Ла Лигада) истеъфога чиқарилган эди.