"Ювентус" асосий ҳужумчиси Душан Влаховични жароҳати туфайли номаълум муддатга йўқотди.
24 ёшли футболчи Сербия терма жамоаси сафида Миллатлар лигасининг 6-турида Данияга қарши ўйинда (0:0) жароҳат олиб, ўйиннинг 88-дақиқасида алмаштирилди.
La Gazzetta dello Sport нашри хабарига кўра, ҳужумчи чап сонини жароҳатлаган, жароҳатнинг оғирлиги эса у Туринга қайтганидан кейин ўтказиладиган тиббий кўрик натижаларига кўра аниқланади.
Тахминларга кўра, сербиялик форвард жароҳати туфайли 23 ноябрь, шанба куни бўлиб ўтадиган "Милан"га қарши А Сериянинг 13-тури доирасидаги сафар учрашувида иштирок эта олмайди.
Жорий мавсумда Влахович "Ювентус" сафида барча мусобақаларда 16 та ўйин ўтказиб, 9 та гол ва битта голли узатмани амалга оширди.
