“Астон Вилла” дарвозабони Эмилиано Мартинес Аргентина терма жамоасининг муваффақиятлари ва яқин келажаги ҳақида гапирди. 32 ёшли дарвозабон Перуга қарши ўтган йилнинг сўнгги ўйинида (1:0) "албиселеста"нинг ғалабасига ёрдам берди.

Аргентиналиклар 12 турдан кейин 25 очко билан саралаш гуруҳида пешқадамлик қилмоқда ва иккинчи ўриндаги Уругвайдан 5 очко олдинда.

"Бу йил бизда фахрланадиган нарса бор. Биз яна Америка чемпионига айландик, саралаш босқичида биринчи ўриндамиз, ўйин борасида ҳеч кимдан кам эмасмиз. Олдинда бизни Испания билан Финалиссима ва жаҳон чемпионати кутиб турибди.

Кўпгина ёш футболчиларимиз ўйин дақиқаларига эга бўлмоқдалар, уларга давомийлик керак. Биз фахрланишимиз керак. Биз энг яхши жамоа бўлишни истаймиз ва келажакда ҳали кўп иш қилишимиз керак", - дейди Эмилиано Мартинес.