Про лига 27-туридан ўрин олган "Хоразм" – "Машъал" (0:0) учрашувидан сўнг муборакликлар бош мураббийи Асрор Алиқулов матбуот анжуманида иштирок этди.

"Ўйинга келсак, жанговар ва юқори темпда ўтди. Икки жамоа ҳам яхши тайёргарлик кўргани сезилди. Майдон ҳолати сифатли ўйин намойиш этишга имкон бермади. Икки жамоа ҳам узун паслар билан ўйнашга ҳаракат қилди. Ҳисоб учрашувга мос бўлди. Ғалабани кўзлаб майдонга тушганди, аммо ўхшамади. Кейинги ўйинларда буни тўғрилашимиз керак", – деди Алиқулов

— Ўйин бошида мураббий чизмаси ўзгаргандек бўлди. Футболчилар мураббий кўрсатмаларига қанчалик риоя қилди?

— Биринчи вазифамиз "Хоразм" футболчиларига бўшлиқ яратиб бермаслик эди. Рақиб таркибида Суперлигада ҳаракат қилган футболчилар бор. Қайсидир ҳолатларда уларнинг устунлиги сезилиб турди. Ҳимояни ўйлаган ҳолда ўзимиз ҳам ҳужум қилишни кўзлагандик. Бундан ташқари, босимлар ҳам уюштириб турдик. Бироқ ҳужумда техник қобилиятимиз баланд эмаслиги кўринди. Умуман олганда, футболчиларга охиригача курашишгани учун миннатдорлик билдираман.

— "Машъал" Суперлигага чиққани билан табриклаймиз. Жамоа кейинги мавсумда Суперлигада ўйнамаслиги, чунки лигада 2 та Қашқадарё вакили қатнашиши вилоятга қийинчилик туғдиради, деган гап-сўзлар тарқалди...

— Бу нарса ҳақида эшитганимиз йўқ. Ҳомийимиз бизни қўллаб-қувватлаяпти. "Машъал" ҳаққоний равишда Суперлига йўлланмасини қўлга киритди. Ўйлайманки, жамоа Суперлигага муносиб. Бу хурсандчиликни тортиб олиш нотўғри деб ўйлайман.

— Суперлигада ўзингиз жамоага бош бўлсангиз, "Машъал" ўзаги қанчалик ўзгаради?

— Ҳозир Про лига ва Суперлига ўртасидаги тафовут сезилиб турибди. Сезилиб турибдики, Про лигадаги айрим футболчилар Суперлигада қўним тополмаган ўйинчилардир. Яхши савияга эга маҳаллий футболчини топиш мушкул. Шунинг учун ҳар бир жамоа легионерлар хизматидан фойдаланмоқда. Суперлига савияси анча ўсган. Про лигадан Суперлигага чиққан жамоа кучайтирилиши табиий ҳол.