Ла Лиганинг 14-турида "Атлетико" ўз уйида "Депортиво Алавес"ни мағлуб этди.

Ушбу ўйин Диего Симеоне учун юбилейга айланди. У "матрасчилар" бошқарувида 700-ўйинини ўтказиб, Испанияда битта клуб билан энг кўп ўйин ўтказган мураббий сифатида рекорд ўрнатди.

Симеоне Мадрид жамоасига 2011 йилнинг охирида мураббийлик қила бошлади, аммо унинг илк ўйини 2012 йилда бўлиб ўтди. Шундан бери жамоа унинг раҳбарлигида 413 та ўйинда ғалаба қозонди, 156 марта дуранг қайд этди ва 131 марта мағлубиятга учради.

Шунингдек, Диего "Атлетико" билан биргаликда 8 та совринни қўлга киритган. Улар қаторига 2 та Европа Лигаси, 2 та Испания чемпионати, 2 та УЕФА Суперкубоги, 1 та Испания Кубоги ва 1 та Испания Суперкубоги киради. 2015/16 йилги мавсумда эса у "Энг яхши клуб мураббийи" унвонига сазовор бўлган.