Ярим ҳимоячи Эдерсонни сотиш масаласида «Аталанта»нинг позицияси маълум бўлди.

Бразилиялик футболчига «Ливерпуль» ва «Манчестер Юнайтед» даъвогарлик қилмоқда, шунингдек, у «Манчестер Сити»нинг мақсадлари қаторидан ўрин олган. Журналист Николо Скиранинг сўзларига кўра, «Аталанта» хавбекни январь ойида қўйиб юбормасликка қатъий қарор қилган. Бергамо клуби 25 ёшли футболчини сотишдан камида 60 миллион евро ишлаб олиш ниятида, бироқ таклифларни фақат ёзги трансфер ойнасидан кўриб чиқади.

Эдерсон жорий мавсумдаги барча турнирларда Жан Пьеро Гасперини жамоаси сафида 18 та ўйин ўтказиб, иккита гол ва битта голли узатмани амалга оширди.