Испаниянинг “Барселона” клуби дарвозабони Виктор Валдес кўк-анорранг либосда ўзининг 500 учрашувини ўтказди. Клуб расмий сайтининг ёзишича, Испания чемпионатининг 36-тури доирасида кечган “Валядолид”га қарши ўйинда бу юбилей амалга ошган.

“Барса” таркибида 500 ва ундан ортиқ ўйин ўтказган футболчилар кўп эмас – Валдес уларнинг тўртинчиси бўлди. Бунгача ушбу маррага Хави, Пуйоль ва Мигели эриша олган эди.

Валдес Барселонага келганига 11 йилдан ошган ва у шу вақт давомида 500 та учрашувида 416 марта тўп ўтказиб юборган (бу ўртача ҳар бир ўйинга 0,83 тадан гол дегани). Испаниянинг амалдаги чемпиони тарихидаги энг узоқ “қуруқ” серия намойиш этган дарвозабон ҳам айнан Виктор Валдес. У 896 узлуксиз дақиқа давомида ўз дарвозаси даҳлсизлигини сақлай олган, шу билан биргаликда “Барса” сафида 20та турли даражадаги жамоавий совринларни қўлга киритган.