Якунланган мавсумда Италия чемпионатида“кумуш” медалларни қўлга киритиб, Европа Чемпионлар лигасида иштирок этиш ҳуқуқини қўлга киритган “Наполи” жамоаси бош мураббийи Вальтер Маццари ортиқ бу клубда ишламоқчи эмас.

2:1 ҳисобида “Рома”нинг ғалабаси билан якунланган сўнгги тур ўйинидан сўнг Маццари Неаполни тарк этишга қарор қилган.

“Мен мухлисларга ташаккур айтган ҳолда “Наполи”даги фаолиятимни якунлаяпман. Бу қарорни бир қанча вақт олдин қабул қилгандим. Шунингдек, қароримни ўзгартиришимни сўнгги сонияларгача кутган клуб Президентига ҳам ўз миннатдорчилигимни билдирмоқчиман. Аслида ўтган ёзда жамоани тарк этмоқчи бўлгандим, аммо ушбу мавсумнинг қанчалик қийин кечишини билган бўлсам-да таваккал қилган ҳолда жамоада қолгандим. Фабио Капелло бир сафар шундай деганди – “Италияда 4-5 йилдан ортиқ бир жамоада қолиш жуда қийин масала”. Агар мен бош мураббийликдан кетмасам, ишонаманки клубнинг баъзи аъзолари бу ерда ўзларини ноқулай ҳис қила бошлашади”, дея мураббийнинг сўзларидан иқтибос келтирмоқда хориж матбуоти.

Эслатиб ўтамиз, Маццари Неаполда 2009 йилдан буён фаолият олиб боради. Аввалроқ мураббийга Россиянинг бир қатор клублари, жумладан "Анжи", "Локомотив" ҳамда "Динамо" қизиқиш билдираётгани, буларнинг орасида "Анжи" варианти анча ҳақиқатга яқин эканлиги хабар қилинган эди.