Саудия Арабистонининг  “Ан-Насср” ва Португалия терма жамоаси ҳужумчиси Криштиану Роналду 30 ёшга тўлганидан кейин 450 та гол урди. Ҳужумчи Осиё Чемпионлар Лигаси доирасидаги “Ал-Гарафа”га (3:1) қарши ўйинда дубль қайд этиб, бу кўрсаткичга эришди.

Криштиану Роналду расмий ўйинларда 913 та гол урган тарихдаги биринчи футболчи бўлди. Роналду “Спортинг” учун 5 та, “Манчестер Юнайтед” сафида 145 та, “Реал” билан 450 та, “Ювентус” сафида 101 та, “Ан-Насср”да 78 та ва миллий терма жамоа сафида 134 та гол урган. Ҳужумчи миллий терма жамоалар, Европа чемпионати, Чемпионлар Лигаси ва Клублар ўртасидаги Жаҳон чемпионати тарихидаги энг яхши тўпурар ҳисобланади.

Жорий мавсумда Роналду клуб сафида барча мусобақаларда 15 та ўйин ўтказиб, 12 та гол ва 2 та голли узатмани амалга оширди. Футболчининг амалдаги клуби билан меҳнат шартномаси 2025 йилнинг ёзига қадар амал қилади. Transfermarkt интернет порталида берилган маълумотларга кўра, 39 ёшли футболчининг бозор қиймати 15 миллион еврони ташкил қилади.