"Манчестер Сити" ҳужумчиси Эрлинг Холанд Чемпионлар лигасининг барча даврлардаги энг яхши тўпурари сифатида тез ўсишда давом этмоқда.
24 ёшли футболчи “Фейеноорд”га қарши ўйинда (3:3) дубл қайд этган бўлса, шаҳарликлар якунда уч бор гол ўтказиб юборган ҳолда уч голлик устунликни қўлдан бой берди.
Норвегиялик футболчи Чемпионлар лигасида аллақачон 46 та гол урган. У бу кўрсаткич бўйича “Челси”нинг машҳур собиқ ҳужумчиси Дидье Дрогбадан ўзиб кетди. Шу билан бирга, ивуарлик 92 та ўйин ўтказган бўлса, ҳозирги "Сити" юлдузи атиги 44 та ўйинда майдонга тушган.
Бундан ташқари, Холанд “Бенфика”да ўйнаган афсонавий Эйсебио (65 та ўйин) ва “Ювентус” ва “Милан”нинг собиқ ҳужумчиси Филиппо Индзаги (81 та ўйин) билан тенг голларга эга бўлиб турибди.
