"Manchester Siti" hujumchisi Erling Xoland Chempionlar ligasining barcha davrlardagi eng yaxshi to‘purari sifatida tez o‘sishda davom etmoqda.
24 yoshli futbolchi “Feyenoord”ga qarshi o‘yinda (3:3) dubl qayd etgan bo‘lsa, shaharliklar yakunda uch bor gol o‘tkazib yuborgan holda uch gollik ustunlikni qo‘ldan boy berdi.
Norvegiyalik futbolchi Chempionlar ligasida allaqachon 46 ta gol urgan. U bu ko‘rsatkich bo‘yicha “Chelsi”ning mashhur sobiq hujumchisi Didye Drogbadan o‘zib ketdi. Shu bilan birga, ivuarlik 92 ta o‘yin o‘tkazgan bo‘lsa, hozirgi "Siti" yulduzi atigi 44 ta o‘yinda maydonga tushgan.
Bundan tashqari, Xoland “Benfika”da o‘ynagan afsonaviy Eysebio (65 ta o‘yin) va “Yuventus” va “Milan”ning sobiq hujumchisi Filippo Indzagi (81 ta o‘yin) bilan teng gollarga ega bo‘lib turibdi.
