Самарқанд шаҳрида Профессионал теннисчилар уюшмаси – АТР мусобақалари тақвимига кирувчи анъанавий “Челленжер” халқаро турнири якунланди.

1996 йилдан буён мунтазам равишда ўтказиб келинаётган мазкур мусобақада бу йил Ўзбекистон, АҚШ, Австралия, Испания, Португалия, Франция, Буюк Британия, Чехия, Сербия, Хорватия, Янги Зеландия, Россия, Беларусь, Украина, Молдова, Словакия, Хитой Тайпейи ва Ҳиндистон спортчилари яккалик ва жуфтлик баҳсларида ғолиблик учун кураш олиб бордилар.

Эътиборлиси, йилдан-йилга нуфузи ва даражаси юксалиб бораётган ушбу халқаро турнирнинг жуфтликлар мусобақасида Ўзбекистоннинг иккинчи рақамли теннисчиси Фаррух Дўстов украиналик шериги Александр Недовесов билан ҳамкорликда бош совринни қўлга киритди. Мазкур жуфтлик ҳал қилувчи финал учрашувида молдовалик Раду Албот ва австралиялик Жордан Керр дуэтини икки сет якунларига кўра 6-1, 7-6 ҳисобида мағлубиятга учратди. Фурсатдан фойдаланиб, Фаррух Дўстовни қўлга киритилган навбатдаги  ғалаба ҳамда яна икки кундан сўнг нишонланадиган таваллуд айёми муносабати билан чин дилдан қутлаб қоламиз.

Яккалик беллашувларида эса россиялик Теймураз Габашвили барча рақибларидан устун келиб, бош соврин соҳиби бўлди.