Мадриднинг “Реал” клубининг бразилиялик ҳужумчиси Эндрик “қаймоқранглилар”нинг Ла Лиганинг 15-туридан ўрин олган “Хетафе”га қарши ўйинда франциялик юлдуз ҳужумчи Килиан Мбаппе билан бирга майдонга тушади. Бу ҳақда Испаниянинг Relevo нашри хабар берди.
Манба берган хабарга кўра, Чемпионлар лигаси доирасидаги "Ливерпуль" билан муваффақиятсиз ўйиндан (0:2) сўнг "Реал" бош мураббийи Карло Анчелотти бир қатор ҳужумкор футболчиларни алмаштиришга қарор қилган. Марсисайдликлар билан ўйинда Браим Диаз Мбаппе билан бирга ўйнади.
Эслатиб ўтамиз, бразилиялик ҳужумкор футболчилар Винисиус Жуниор ва Родриго жароҳат олган ва мадридликлар жамоасининг бўлажак ўйинларида қатнашмайди.
