Испания терма жамоаси сафида Европа чемпиони, Саудиянинг “Ан-Наср” жамоаси марказий ҳимоячиси Аймерик Лапорт “Реал” бош мураббийи Карло Анчелоттининг қишки трансфер ойнасидаги асосий истагидир. Бу ҳақда The Athletic ижтимоий тармоқларда хабар берди.
Манбага кўра, "Лос Бланкос" Анчелотти илтимосига кўра Лапортнинг трансферини ўрганмоқда, аммо уни қўлга киритиш испан гранди учун молиявий жиҳатдан қийин бўлиши тахмин қилинмоқда.
Қолаверса, Мадрид клуби муқобил вариант сифатида "Наполи"да ўйин вақти камлигини бошдан кечираётган Рафа Мариннинг қайтишини ўрганмоқда.
Марин ўтган ёзда "Реал"дан 12 миллион евро эвазига италян клубига ўтган эди. Бу мавсумда Марин Италия кубогида фақат битта ўйин ўтказди.
