«Шўртан» – «Пахтакор» баҳси якунига етганидан сўнг одатдагидек ҳар иккала жамоа устозларидан интервью олдик. Дастлаб «Пахтакор» бош мураббийи Мурод Исмоилов ўз фикрларини билдириб ўтди.

— Бугунги баҳс жуда қизиқарли бўлди. «Шўртан» жамоаси бизга астойдил қаршилик кўрсатди. Биринчи бўлимда урган голларимиз эвазига ғалаба қозондик деган фикрдаман. Танаффусдан сўнг майдон эгалари ҳужумга янада зўр беришди, захирадан тушганлар ҳам ўйинни кучайтира олишди. Гарчи ютқазиб қўйган бўлишига қарамай, «Шўртан»нинг ўйини менда илиқ таассурот қолдирди. Мана шундай мухлисбоп ўйинлар кўпайиши тарафдориман. Бу ғалаба «Пахтакор»нинг жорий чемпионатда сафардаги биринчи ғалабаси бўлди.

— Яқинда «Шўртан»ни Зоир Тўрақулов қабул қилиб олганидан хабарингиз бор. Жамоа ўйинида ўзгариш сездингизми?
— Футболда 10-15 кун ичида катта ўзгаришни амалга ошириш ниҳоятда қийин. Менимча, янги мураббий барибир олдин қўйилган пойдевор асосида иш олиб борса керак. Рақибни ўрганиш жараёнида «Шўртан»нинг олдинги ўйинларини кўргандим ва бугунги баҳс билан таққослайдиган бўлсам, футболчилар ҳаракатида ўзгариш борлиги сезилди. Яъни, ўйинчилар орасида боғлиқлик пайдо бўляпти. Негадир Эдгар Гесс пайтида жамоа бирмунча оғир ҳаракат қиларди, бугун эса майдон эгалари анча енгил ўйнашди. Бунда албатта Зоир аканинг ҳиссаси бор деб ўйлайман.

— Матбуотда «Нефтчи» бош мураббийи бўлишингиз ҳақида хабарлар тарқалди. Бунга ойдинлик киритиб ўтсангиз.
— Тўғри, шундай таклиф бўлди ва менинг «Нефтчи» раҳбариятига оғзаки розилигимни билдирганим рост. Лекин ҳозирча бу иш амалга ошмаса керак, чунки биринчидан, «Пахтакор» билан шартномам бор, иккинчидан клубимиз раҳбари билан ҳали бу мавзуда суҳбатлашмадик.