Гус Хиддинк мавсум якунида аниқ "Анжи"ни тарк этади, дея хабар бермоқда "Советский спорт".
Нашр маълумотларига кўра, ҳозирда голландиялик мутахассис ўрнига икки асосий номзод масаласи кўриб чиқилмоқда. Булар - "Наполи"да фаолият олиб бораётган Вальтер Маццари ва "Манчестер Сити" собиқ бош мураббийи Роберто Манчинилардир.
Агар аввалроқ тарқалган Маццарининг "Интер" билан икки йиллик шартнома тузишга яқин турганини ва ҳозирча Манчинининг бошқа бирор клуб билан музокараларга киришмаганидан хулоса қиладиган бўлсак, собиқ "шаҳарлик" мураббий тез орада Россияда пайдо бўлиши мумкин.
Эслатиб ўтамиз, "Анжи"нинг амалдаги бош мураббийи Гус Хиддинк Махачқальадаги фаолиятини якунлагач, мураббийлик карьерасини ҳам тугатмоқчи. Аммо у футболдан кетмайди, балки бошқа лавозимларда иш олиб боради, дея хабар берган Россиянинг "Советский спорт" нашри.
