"Ливерпуль" бош мураббийи Арне Слот вингер Федерико Кьезанинг Лига кубоги доирасида "Саутгемптон"га (2:1) қарши ўйиндаги ҳаракатларига баҳо берди.

Италиялик футболчи танаффусдан кейин захирадан майдонга тушди. Бу "Ювентус"нинг собиқ юлдузининг деярли уч ой ичида биринчи марта майдонга тушиши эди.

"Федерикони қайтганини кўрганимдан хурсандман, унинг бугунги ўйинида ижобий дақиқалар бўлди. Мен унинг яхши ишлар қилганини кўрганман, баъзиларида эса ўзимча "Яхшироқ қиласан", деб ўйладим. Аммо менимча, узоқ вақт майдонга тушмаган футболчи учун бу мутлақо нормал ҳолат", деди Арне Слот ўйиндан кейин ОАВ билан суҳбатда.