"Пари Сен-Жермен" ҳужумчиси Рандал Коло-Муанига "Ювентус" қизиқиш билдирмоқда.
Франциялик футболчи парижликлар бош мураббийи Луис Энрикенинг режаларига киритилмаган, шу боис клуб раҳбарияти январь ойида форвард билан хайрлашиш имкониятини кўриб чиқади. Журналист Альфредо Педулланинг ёзишича, "Ювентус" Коло-Муанини ўз сафида кўрмоқчи. "Кекса сеньора" 26 ёшли футболчини январда ижарага олиш ҳақида ўйламоқда. Шартнома, эҳтимол, сотиб олиш вариантини ўз ичига олади.
Рандал Коло-Муани Энрикенинг қарорига кўра, сўнгги икки ўйинда "ПСЖ" сафида ўйнай олмади. Франциялик футболчи ушбу мавсумда 14 та ўйинда майдонга тушиб, 2 та гол урди ва битта голли узатмани амалга оширди. Transfermarkt портали вице-жаҳон чемпионининг нархини 30 миллион еврога баҳоламоқда.
