2001 кузида Италия терма жамоаси (Европа вице-чемпиони) Пьяченца шаҳрида ўртоқлик учрашувида майдонга тушганди.
Ўшанда Жованни Трапаттони жамоаси ҳозир Верона мэри лавозимида ишлаётган Дамиано Томмазининг ягона голи эвазига Марокаш терма жамоаси устидан ғалабага эришган, лекин ЖЧ-2002 турнирида муваффақиятсизликка учраганди.
1993/94-2002/03 йиллар мавсумлари оралиғида маҳаллий тадбиркор Гарилли тасарруфидаги "Пьяченца" клуби "А" сериясида тўп сурди. Кейин жамоа 2011 йилга қадар ўз савиясига анча яқин бўлган "В" сериясида иштирок этганди. Барчамизга яхши таниш ака-ука Инзагилар айнан шу шаҳарда туғилиб, улғайишган ва номдош клуб академиясида таҳсил олишган. 2006 йилда жаҳон чемпиони унвонини қўлга киритган Альберто Жилардино профессионал фаолиятини шу жамоада бошлаган, кейинчалик таниқли мураббий мақомига кўтарилган Стефано Пиоли эса "В" сериядаги мавсумларнинг бирида "Пьяченца"ни бошқарганди.
Яқин ўтмиш воқеаларини эслатиб ўтишимизнинг асосий сабаби шуки, ҳозир ҳаваскорлар "D" сериясининг тубида юрган "Пьяченца" ўзининг юз йиллик тарихида шонли даврларни ҳам бошдан кечирган. Унинг Леонардо Гарилли (90-йилларда жамоани "С" сериясидан "А" сериясига олиб чиққан шахс) номидаги стадионида 2001 йилда бўлажак жаҳон чемпионлари - Каннаваро, Матерацци, Замбротта, Гаттузо ва Филиппо Инзагилар Италия терма жамоаси либосида майдонга тушишган. Лекин 2010|11 йиллар мавсуми якунига кўра "В" сериясини тарк этди: аввалига банкротга учради, кейин "D" сериясида қайтадан шаклланиб, "С" сериясига кўтарилди ва яна "D" сериясига қайтди.
Ўтган мавсумда жамоа "С" сериясига чиқиш арафасида турганди. Бироқ сўнгги турдаги мағлубият барча ҳаракатни пучга чиқарди. 1-1,2 млн. евро бюджетга эга "Пьяченца" шу мавсумда профессионал футболга қайтишни режалаштирганди. Бироқ амалда жамоанинг барча уринишлари чиппакка чиқаверди. Октябрдаги мураббий алмашуви самара бермади, 19 ноябрда эса, "Пьяченца" эҳтимол, чинакам жаҳон рекордини ўрнатгандир. Шу бир кун ичида клуб 3 нафар мутахассисни ўзининг бош мураббийи, деб эълон қилди. Эрталаб Кармине Парлато, тушликда Симоне Бентивольо, кечки пайт Стефано Россини жамоатчиликка таништирилди. Ўша куни Бентивольо кундузги машғулотни ўтказишга улгурган, Россини эса мавсум бошида "Пьяченца" билан шартнома имзолаганди: 7 октябрда Парлато унинг ўрнини эгаллаганди.
Мутасаддилар Кармине Парлато билан спорт директори Алессио Сестани жамоа "Сан-Марино" клубига имкониятни бой берган куни истеъфога чиқаришди. Қизиғи шундаки, ўша 17 ноябрь санасида Апенниндаги митти мамлакат терма жамоаси "D" дивизиондан "С" дивизионга кўтарилган, унинг таркибидаги "Сан-Марино" клуби вакиллари "Пьяченца"га қарши ўйинга келишмаганди. Бироқ бу йўқотиш клубнинг Пьяченцадан ғалаба билан қайтишига халал бермади.
Хуллас, 19 ноябрда мураббий ва спорт директори истеъфога чиқарилди, янги спорт директори Зерминьяни Парлато ўрнига Бентивольони олиб келди.
Клуб сайтидаги эрталабки хабардан сўнг, мухлислар исён кўтардилар. Аслида, 22000 мухлисга мўлжалланган стадионга 1000га яқин мухлис келади, уларнинг 100га яқини "ультрас" номли фанатлар. Ана шу шоввозларнинг 5-6 нафари мураббий ва клуб президентига кескин норозилик билдиришди: "Бентивольо ҳозироқ клубни тарк этади ёки биз уй ва сафар учрашувларига боришни тўхтатамиз".
Саросимага тушиб қолган клуб раҳбарияти аввалги мураббийни қайтаришга қарор қилди, лекин Парлатони эмас, Россинини таклиф этди. Натижада янги спорт директори Зерминьяни ўзини қониқтирмайдиган мураббий билан ишлайдиган бўлди.
Қувноқ "Пьяченца"ни қандай келажак кутмоқда?
Мураббий алмаштириш бўйича жаҳон рекорди ўрнатилган куннинг эртасига 100 000 аҳолиси бўлган шаҳар жамоаси "D" сериясидаги кубок баҳсида атиги 6000 кишилик шаҳарча жамоасини маҳв этди. "А" серияси лаззатини тотиб кўрган клуб янги мавсумда ана шу рақибига ўхшаш "Ниббиано Вальтидоне" жамоаси билан битта дивизионда тўп суриш хавфи остида турибди. Ваҳоланки, "Пьяченца" шу пайтгача ўзининг ён қўшниси бўлмиш митти жамоачага фақат юқоридан назар ташлаб турганди...
А.АҲМЕДОВ тайёрлади
