"Ливерпуль" АПЛ 17-туридан ўрин олган ўйинда "Тоттенхэм"ни меҳмонда 6:3 ҳисобида мағлуб этди, меҳмон жамоанинг мисрлик вингери Муҳаммад Салоҳ учрашув давомида иккита гол урди ва иккита голли узатмани амалга оширди.
Шу тариқа, 32 ёшли Салоҳ чемпионатда 252 та голда иштирок этди (172 гол ва 80 голли узатма) ва 249 та голда иштирок этган (175 гол ва 74 голли узатма) "Арсенал"нинг собиқ ҳужумчиси Тьерри Анрини ортда қолдирди. Салоҳ ҳозирда Премьер-лиганинг барча вақтлардаги энг самарали футболчилари орасида еттинчи ўринни эгаллаб турибди, Алан Ширер 328 очко (260 гол ва 68 голли узатма) билан биринчи ўринда.
Эслатиб ўтамиз, Салоҳ Премьер-лига тарихида Рождествога қадар 10+ гол урган ва 10+ голли узатма берган биринчи футболчи бўлди. У айни дамда Англия Премьер-лигасининг жорий мавсумида тўпурарлар ва голли узатмалар рейтингида пешқадамлик қилмоқда.
