Эрон терма жамоаси собиқ футболчиси Али Каримий кеча берган баёнотида терма жамоа ЖЧга чиқиши учун барча Карлос Кейрушга ёрдам бериши кераклигини айтиб ўтди. Каримийнинг ўзи эса яқинда бўлиб ўтган Эрон Ҳавзий кубоги финал баҳсидан кейин футболчилик фаолиятини якунлашга қарор қилганди.
"Биз оғир ҳолатда эканимизни барча яхши ҳис қилиб турибди. Жаҳон чемпионатига чиқишимиз учун ҳамма мураббийнинг қарорини ҳурмат қилиши ва уни қўллаб-қувватлаши лозим", дейди Каримий. "Бугундан бошлаб мен Эрон миллий терма жамоасини мухлис сифатида қўллаб-қувватлайман. Терма жамоа саралаш босқичида йўлланмани қўлга киритиб, Эрон халқаини хурсанд қилади, деган умиддаман".
Али Каримий 14 йил давомида Эрон терма жамоаси сафида 127та ўйинда майдонга тушиб, 38та гол урган. Тўпурарлар рўйхатида у Али Даий ва Карим Бағирийдан кейин учинчи ўринда бормоқда.
Эслатиб ўтамиз, Эрон терма жамоаси 4 июнь куни Қатар меҳмони бўлса, 11 июнь куни Ливанни қабул қилади. 18 июнь куни эса Жанубий Кореяга сафар уюштиради. Форслар ҳозирдаа 7 очко билан 3-ўринни эгаллаб турибди.
