«Бунёдкор» - «Шўртан» учрашувидан кейинги матбуот анжуманининг биринчи қисмида ғузорликлар устози қатнашди.

- Очиғини айтганда, “Бунёдкор” майдонида бу қадар шижоатли ўйин кўрсатамиз деб ўйламагандим. Учрашувни охирги дақиқаларигача ҳимояда мардонавор турдик. Афсуски, сўнгги дақиқада гол ўтказиб юбориб, якунда мағлуб бўлдик. Тан оламан, “Бунёдкор” ўйин бўйича бизни енгди. Агарда биз ҳам қарши ҳужумда яратган вазиятларимизни голга айлантира олганимизда эди, ҳозир бошқача кайфиятда ўтирган бўлармидим... Тақдир экан, жамоани қабул қилиб олгач “Насаф”, “Пахтакор” ва мана энди “Бунёдкор” билан кетма-кет ўйин ўтказяпман. Аммо мен ўзимга ишонмаганимда клубни қабул қилиб олмасдим.

Турнир жадвалига назар ташласак, “Нефтчи”, “Динамо”, “Қизилқум” ва “Шўртан”нинг аҳволи ҳавас қиладиган даражада эмас. Эътиборлиси, бу жамоаларнинг мураббийлари ўзгарди. Давралар оралиғида таркибни кучайтира олган жамоаларгина якунда олий лигада ўз ўрнини сақлаб қолади, - дейди Зоир Нарзуллаевич.